అదుర్స్ సినిమా రీళ్లను తగులబెట్టారు.

February 8, 2010

తెలంగాణ నేతలపై గుడివాడ ఎమ్మెల్యే, అదుర్స్ సహ నిర్మాత కొడాలి నాని చేసిన వ్యాఖ్యలు తీవ్ర దుమారాన్ని రేపుతున్నాయి. టీఆర్‌ఎస్ తీవ్ర ఆగ్రహం వ్యక్తం చేయగా.. అదుర్స్ సినిమాను చాలా చోట్ల అడ్డుకున్నారు. వరంగల్, నల్గొండ జిల్లాలలో ధియేటర్ల ముందు ఆందోళన నిర్వహించి సినిమా రీళ్లను తగులబెట్టారు. తెలంగాణ ప్రజలకు నాని క్షమాపణ చెప్పాలని వారు డిమాండ్ చేస్తున్నారు. కొన్ని చోట్ల బిందాస్ సినిమాను కూడా అడ్డుకున్నారు.
వరంగల్ లోని థియేటర్లలో అదుర్స్ సినిమాతో పాటు మోహన్ బాబు కుమారుడు నటించిన బిందాస్ సినిమా ప్రదర్సనకు కూడా బ్రేకులు పడ్డాయి. వరంగల్ జిల్లాలోని జనగామలో కూడా అదుర్స్ సినిమా ప్రదర్శన ఆగిపోయింది. కరీంనగర్ జిల్లాలోని హుస్నాబాద్, కరీంనగర్, గోదావరిఖని, వేములవాడ తదితర ప్రాంతాల్లో ఎనిమిది చోట్ల అదుర్స్ సినిమా ప్రదర్శన ఆగిపోయింది. మహబూబ్ నగర్ జిల్లాలోని ఆమనగల్ లో తెలంగాణవాదులు అదుర్స్ సినిమా రీళ్లను దగ్ధం చేశారు. షాద్ నగర్ లో కూడా అదుర్స్ సినిమా ప్రదర్శన ఆగిపోయింది. నాగర్ కర్నూలులో జూనియర్ ఎన్టీఆర్ కటౌట్లను దగ్ధం చేశారు. నిజామాబాద్ జిల్లా కేంద్రంలోనూ కామారెడ్డి తదితర ప్రాంతాల్లోనూ అదుర్స్ సినిమా ప్రదర్శన ఆగిపోయింది. నల్గొండ జిల్లాలోని హాలియాలో అదుర్స్ సినిమా ఆగిపోయింది.